筆者喺舊年7月2日於《還我懷柔路政！》一文批評市區欄河霸道，點知今日要輪到為鄉村同郊野公園嘅天然路徑出頭。目前全港有24個郊野公園，覆蓋面積達四萬三公頃之巨，佔去香港陸地面積約四成之多，無怪乎每年遊客亦達千二萬之數！
但係越來越多證據表明，政府嘅怕孭鑊心態及鑽牛角尖嘅「健安」（喺外國叫做Health and Safety）思維已經病入膏肓，幾乎到咗令郊遊人士搖頭嘆息嘅地步。最近較出名嘅例子莫過於去年九月運輸署以安全為由，喺市民眾志成城嘅反對下第三度到中西區區議會推銷佢在舊山頂道行人徑興建圍欄嘅反智工程。主打呢個項目嘅官員們所依靠嘅唔係常識（舊山頂道從來冇人因為冇圍欄而跌落山嘅紀錄！）而係一封09年1月收到嘅一名行山人信，指該行山徑不夠安全！如果唔係常識勝利下最終收回成命，政府將為此要浪費70萬元納稅人嘅血汗錢去更加鞏固香港嘅石屎森林，進一步破壞僅餘嘅零星自然環境，以及人們得以行錯一步而受皮肉傷嘅殘餘嗰0.00001%機會。如欲知更多詳情，可閱此情理俱備網上文章：http://www.facebook.com/note.php?note_id=392169731125。
舊山頂道嘅原本山道雖暫脫魔掌，但係只要問問任何經常行山嘅市民就會發現原來呢個政府嘅「健安」運動已經如流感咁傳到漫山遍野，幾乎無一地區，無日郊野公園幸免於難，所差者只係輕重嘅分別而已，見附圖例子如下。其實郊遊同任何運動一樣，都係親近大自然同遠離越趨全面人工控制嘅城市居住環境，如果我哋將市區嘅石屎森林及溫室安逸全面照搬，咁不如留喺屋企打虛擬行山遊戲真實感更強？既然出得嚟運動，梗會預咗會有少少磨損擦傷，唔係嘅話不如去Gym算數？
政府一日以避責同安全為管理郊野嘅首要任務，就一日都會繼續摧毀我哋既可愛又天然嘅郊野資源，直至整個郊野公園都鋪滿軟膠，市民如入精神病院禁錮重病人嘅軟墊病房為止。
財爺，請你務必喺預算案前為運輸局、土木工程署、水務署、拓展署等部門嘅資本預算做一個全面嘅審核，然後為民著想，削晒佢哋可以用於「健安」方面嘅開支，喺省回億萬公帑嘅同時交番市民受傷嘅自由。
喺香港投資有樣好處，就係樣樣實物資產都係新供應低，唔似內地咁任何花錢可以起得出嚟嘅建築物都保證係大白象滿地，導致資本浪費、無謂競爭、兼服務水準低落。不過，香港嘅好處喺政府近年施政寸步難行及缺乏遠見下已經成為未來發展嘅絆腳石——喺包括住宅供應（見筆者10年6月29日文：增加供應：政府在等觀音顯靈乎），陰宅供應（7月20日文：骨灰龕政策有思），寫字樓供應（10月26日文：寫字樓供應危機更甚於住宅），的士牌供應（11月16日文：利民兼紓資產泡沫財爺應解凍的士牌），遊艇位供應（11月23日文：香江衙門屢失先機遊艇樞紐勢拱手讓人）都係……各位可能一啲都唔意外筆者今日講本港機場，提及嘅又喺容量迫爆危機！此外本文亦比較吓競爭對手如何步步進逼，一到香港無能力接新生意之時（一定係早過你同我所料！），就冷手執個熱煎堆搶吾飯碗，到時香港又是只有怪自己唔上進！
12月28日，機管局慶祝咗客貨量雙雙破紀錄至5000萬人次及400萬公噸（全年實際數字最終為5095萬人同413萬噸，同比上升10.3%及23.4%），儀式期間運房局長鄭汝樺話現時計劃足可應付至2020年嘅要求。但係遠至2006年，機管局發表嘅《香港國際機場2025》已經預期2025年客運量會增至8000萬人次，兼喺結論中提到「香港國際機場必須提升跑道的容量」，包括興建第三條跑道。然而五年下來，起第三跑道呢個吾駛搵顧問公司做研究都知嘅結論似乎仲停留喺紙上談兵階段！如果《2025》報告內提及嘅中國民航局預測2010-20年中國客運量10%年增長率應用喺香港，咁我哋有機會喺2015年就超越咗報告內要到2025年先達到嘅8000萬人次水平，即係話，就算聽日即刻拍板去馬，第三跑道都可能已經太遲！
此外，前民航處長林光宇亦提到就算機管局把用量上限由每小時59架次，提升至68架次，機場亦將於2017年飽和（以6.5%年增長率計）。而且，呢個只係一個理論上嘅計算，實際上，繁忙時間已經迫爆咗，任何新航班都要喺三更半夜升降，咁點做國際航運中心？為今之計，只有喺開工起第三跑道嘅同時，開始著手整合港府持股嘅珠海機場為未來改為香港第二機場鋪路，或者更加遠見啲，直情同時開始搵地起第二機場！如果唔係，咁邊個為五至十年後香港機場爆棚負責？
相比之下，其他城市就長線規劃得多；如北京據報會喺今年3月啟動興建位於大興區，具6000萬人吞吐量嘅新機場！喺奧運新機場大樓完工三年唔到就放眼將來，未雨綢繆，咁先係有魄力㗎嗎！再以星加坡為例，彼邦喺1999年已經開始建造彰宜機場嘅T3樓，並喺2008年一月投入服務，令獅城嘅運載能力跳升至7000萬人次（去年嘅實際客量只有4000萬多啲），但星加坡毫無自滿，已經密鑼緊鼓規劃緊Terminal
4，並會喺10-15年內建成！最後，連小弟弟深圳都喺10年二月動工起T3（啱啱喺一月封頂）兼建第二條跑道（今年六月投入使用），令總吞吐量增至4500萬人次（09年實際數字：2200萬），可見只要有決心，起機場係可以高效交貨嘅。
香港，係時候發奮力追啦！
筆者鬧得人多，今期改弦易轍，讚一讚先！對象唔係地產界或政界機構或人士，卻係創意無窮嘅搜尋器一哥Google；何解？因為佢最近推出咗另一個無敵產品叫做「Book Ngam Viewer」（且叫佢「搜書數字器」，網址喺：http://ngrams.googlelabs.com/），令研究任何用文字可表達嘅概念都可以由對某一啲字或辭喺書本嘅出現頻率作長線追蹤嚟比較該字或辭喺1800年到2008年止嘅「曝光率」變化！
因為Google已經掃描/數碼化咗近一千五百萬本書，呢個工具選用較可用嘅五百萬本書（若佔已出版書總量嘅4%）及其中五千億個字（包括3610億英文字同130億中文字）。因此我哋嘅「搜書數字器」都咪話唔公平、強大、有效！
用搜書數字器分析城際競爭
判斷一個國家或城市是否強大，當然唔一定話要佢GDP大過人，又或者樓價高過人；有麝自然香：如果一個城市嘅重要性毋容忽視，咁自然就有好多嘅書藉會提到該城市也。
筆者先喺亞洲區各競逐者之間用英文城市名作比較，發現原來香江喺遠東大埠中一係就係英文出版鼎盛，一係就真係一枝獨秀，遠遠拋離其他城市係書本入便嘅出現頻率（見圖一至圖四）。而歷史亦似乎印證圖中趨勢嘅轉變：
圖一：香港與上海
1）上海20-30年代嘅繁華令其頻率大大高於香江，但係70年代嘅經濟起飛卻造成香江從此超前；問題係，過去幾年本港嘅政治原地踏步加上上海嘅突飛猛進係唔係已經再度令紅藍線交錯？
圖二：香港與東京
2）東京嘅資產泡沫喺80年代尾爆破後，好快就被香港喺90年代初後來居上而追過！
圖三：香港與星加坡
3）星加坡直至80年代尾都被香江多見如書藉，之後亦被本港爬頭；令人擔心嘅只係，香港相對於上海嘅弱勢似乎喺過去兩三年亦喺星加坡身上出現……
圖四：香港與北京
4）「搜書數字器」追蹤文化變遷嘅能力喺北京顯露無遺—直到80年代中，Peking仍係主流稱呼，隨著中國嘅強大及普通話拼音嘅同行，Beijing亦取而代之成為北京嘅統稱！可見用呢個工具做研究分析，對文字歷史亦要有一定嘅認識！
圖五：香港與倫敦（英文）
圖六：香港與倫敦（簡體中文）
5）與倫敦相比，香港嘅英文頻率只有前者若八分之一，可見喺英語世界，香港仍遙遙落後。以簡體字搜索卻得到相反嘅結果，香港大獲全勝；睇嚟簡體中文一係就數碼化得唔夠，一係就係大陸研究英美嘅書籍仍然偏少。一定肯定嘅就係香港冇倫敦係世界上舉足輕重！
近個零禮拜港鐵嘅見報率唔差；除咗行政總裁明年尾唔續約嘅新聞被報道較多外，對公眾民生及政府施政更有重要性嘅卻係「新世紀論壇」、龐愛蘭同鄧咏駿議員辦事處所發布嘅「港鐵旺站商舖太多：阻乘客、礙應變、申請涉偷步」新聞稿！既然有人撩起呢個筆者欲訴已久嘅話題，今個禮拜就因利乘便，借題發揮：
利民空間變汗血廣場
任何十年前，廿年前曾出入過旺角、尖沙咀、銅鑼灣、中環呢啲大地鐵站嘅市民都可以同你證實，過去嗰種車站大堂嘅寬敞明亮、步履閒適嘅日子早已經消失殆盡！因為除咗嗰啲冇商業價值嘅閒站，基本上任何稍有租值（即係高人流）嘅車站，其大堂已經被各類港鐵所安插嘅零售店鋪逼個水洩不通（見圖）！出入站嘅市民有如排隊入屠房嘅豬隻般，步履維艱地被後面嘅人潮推向自己嘅目的地，冇晒尊嚴可言。
以中環站為例，大堂內除咗真正便民嘅設施如銀行，提款機，郵箱，及WiFi熱點之外，其他商店賣嘅都唔係一間市區地鐵站內所必需經營嘅行業：書店、花店令人滯留，增加市民進出阻力；咖啡店、麵包糕餅店除令公眾地方充斥氣味外，更直接鼓勵乘客違例將剛購買嘅食物帶入已付費區內繼續飲食；至於時裝飾物、美容產品、甚至旅行社就更加牽強，同港鐵作為一個做獨市生意嘅公共交通服務提供者角式越扯越無關係！
此外，過份擠迫嘅車站走廊，令人擔憂係唔係已經觸犯咗消防條例？新論壇嘅報告指出淨係旺角站嗰19間商店、尖沙咀站嗰16間、太子站嗰18間已經佔用咗近半公共走廊空間—萬一有火警或炸彈嗰陣，邊夠走廊嚟輸散人群？
利潤動機蓋過服務精神，唔值也
港鐵由08年到10年中，喺車站數目增加兩個嘅情況下，站內商店數目卻跳升60間到1246間之眾；似乎喺零售方面嘅收入2010全年會達17億之數，都咪話唔和味！
新論壇報告亦揭發地政署唔按章批核港鐵更改土地用途嘅申請，導致港鐵能補地價都未批嘅情況下就擅自擴建站內商店，甚或官官相護嘅嫌疑。《詩經·大雅·雲漢》有云：「兢兢業業，如霆如雷」，過去幾年港鐵管治似乎有欠呢股精神矣！
作為一個要為股東謀利嘅上市企業，有利潤最大化嘅商業動機本來無可厚非，只是港鐵同時亦係一個壟斷企業，更係政府控股，咁就應該喺商業行為上提高自己嘅標準到所謂「白過白色」嘅水平，如果唔係若再爆出如八達通賣私隱資料之類嘅醜事嘅話，加強監管，甚至收歸國有嘅呼聲只會增強。
