土地供應規劃應否納入內地港生嬰兒？

最近統計處公佈咗最新嘅《二零一零年至二零三九年香港家庭住戶推算》，當中最有趣嘅數字唔係全港住戶數目由09年嘅231萬增加至39年嘅312萬（即上升35%，或年增長率1.01%），亦唔係此預測與特首早時發表嘅「850萬人口目標」如何不謀而合（推算內人口於39年預算會增至844萬），對本欄讀者來講最要留意嘅數字當然係呢個推算對未來土地供應嘅規劃有幾大嘅指導作用？及鑑於過去呢項統計/推算嘅嚴重不准確性（幾乎每次新推算都較上次調低），土地供應應否完全忽視呢項數據？

圖一：

本文我哋且當推算係準嘅先（起碼喺未來五至六年內），睇睇現有住戶數目預測與住宅供應偏差係大定細：首先，2011-12年嘅供應已有政府預測，包括私人公營房屋在內約20500同29000個單位，之不過喺呢個情況下2012年時237萬8千個單位相對於237萬3千戶家庭似乎擠迫咗啲（即係0.2%嘅空置率）。係呢度我哋且先唔理統計處與差餉物業估價署之間數字可能並不可直接比較，就以統計處嘅2015-16戶口數字來推測未來幾年嘅所需樓宇供應：筆者計到2013年至2016年如果理論上嘅空置率回復歷史平均值（約1.2%），則每年應有3萬7千個單位【圖一中紅線】，即由2011至2016年總共19萬7千個單位【圖一藍線】。由呢個角度睇，政府嘅未來供地目標（每年2萬私人單位，萬五公屋單位）似乎與人口推算相吻合！

圖二：未來人口增長預測似乎冇計入內地在港新生兒呢個爆炸性嘅新增長點

另一報告內更精彩嘅數字卻可能未完全反映喺2039年嘅戶口數字上，佢就係內地父母在港產嬰所能為未來香港人口帶來嘅上升壓力，當然隨之而來嘅就係土地供應不足嘅問題：內地港嬰（即雙親皆非本港永久居民）嘅數字由01年嘅620宗暴升至09年嘅2萬9千多【圖二】，由整體新生嬰兒比例嘅1%去到36%。同樣重要嘅，係佢哋對本港人口增長嘅貢獻比率，亦喺同期內由3%抽升至70%！當2039年時呢批四十歲嘅壯年都嚟香港住嘅話，我哋嘅人口推算/土地供應/建屋計劃又點可以唔計埋佢哋一份？

香港政府認真要未雨綢繆，唔係為未來五年嘅土地供應四出奔走，而係為未來十五年、五十年會出現嘅呢個內地洪流（本地出生或非居民投資需求都好）準備好容量，並喺同時為本地人口腹地殖民開始佈局，否則後果會係得一個字，就係「亂」……