若要高鐵達港島，行人隧道不可少

上星期講咗中環嘅行人天橋前景，今日就討論吓維港跨海行人隧道喺筆者夢想中可能出現嘅璀璨未來！

眾所周知，規劃及運輸當局喺近年嘅行為喺只醉心於為汽車奴役嘅心態下越來越與行人同人力驅動（單車也！）嘅環保健康交通方式過唔去——西九龍大片嘅貴重填海土地已經被重重汽車道路及天橋包圍、瓜分得體無完膚，造成極大嘅社會資源浪費甚至市民具體健康傷害——市民無緣步行至新嘅西九海旁、完全可以架空或下沉嘅公路卻霸道橫行，擠掉本來可作低密度發展嘅住宅／休憩空間、來往高速車輛嘅噪音（達80分貝）及廢氣更對市民健康造成直接傷害……

依家好好一個西九「文化區」招標竟然變成「市區公園」招標，再令文化界同全港關心城市規劃嘅各界人士失望多次，睇嚟全民上街、重複七一遊行嘅「臨界點」確實係所距不遙！
喺咁既環境下，唯一能夠將西九呢個爛攤子起死回生嘅，就係採用「全環保、最健康、帶全球」呢條討好策略啦。筆者所指，乃駁通未來高鐵站兼文化區嘅地下通道，建造世界最吸引（非衙門長處，要招標出去設計營運）、最環保健康、但仍然係最有效嘅海底隧道，連接港島上環至灣仔一帶。以下且描畫幾點具體提議嚟拋磚引玉，但能推動此運動向前已無憾矣：

世界上最吸引嘅過海隧道

設計元素可包括：

1）超輕便電車—可出隧道後依特定路線上天（成為泊埋酒店、商廈一樓嘅快捷電梯）下地（直往地下鐵或地下單車場落客），甚至讓乘客自駕往未來嘅灣仔海旁，駐足觀景。車嘅大細可與哥爾夫球車相若，電源可與現有電車類似，以免充電之惱；

2）水底透明管道—世界第一也，使電車喺海底已可採用日光，甚至觀賞光纖送載嘅維港煙花鐳射燈光表演？此外，亦令香港更有動力早日回復海水清澈見底嘅光輝個去！；

3）綠化步行／單車層—超寬敞嘅行人隧道，令人感覺置身公園花圃，因流水花香圍繞而心曠神怡，而非困於鋼筋水泥壁壘之內，被慘綠燈管包圍，最終遭巨大隧道回音所殲剿！隧道內嘅綠化程度，及隧道嘅寬度，應是與西九／灣仔海旁入口外之環境融為一體，彼此不分，循序漸進，直到已深入海底後行人方可發覺！如此方能真正連接兩大未來海濱公園於無形，為世界級都市所應達之人文城規高點；

4）雙弧形走道—為更方便疏導人流，可考慮喺超輕便電車上岸嘅地點建兩條分岔管道，一條往上環西環（九龍邊延海旁去油麻地避風塘北端），另一條去金鐘灣仔（九龍邊駁去南昌站，以減少北行嘅路上交通流量）。如此豈非比起更多嘅汽車路去紓緩無可紓緩嘅擠塞高明得多？


依家我哋需要嘅就係一個有魄力嘅領導，去做一啲我哋夢寐以求（又與過去汽車掛帥思維一刀兩斷）嘅，能夠喺五十年、一百年後依然自豪嘅，既環保、又美觀、更健體嘅基建，令香港呢個歐亞高速鐵路網終點站嘅「南天門」傲視寰宇。