香港作為富豪天堂─係時候拍賣私人島嶼

講左幾期公營房屋，可能已悶親好多讀者，不如今日討論一個輕鬆好多，但却一樣咁重要既議題，就係點樣將香港另一優勢資源發揚光大，為呢粒東方之珠更添光彩—就係將我地多如牛毛嘅島嶼之價值釋放出嚟！

唔講大家可能唔知，原來喺09年2月，經地政署統計本港連大嶼山同香港島在內總共有成263個島嶼之多（見圖）！呢個數目重係唔計細過5,500呎個啲島嶼（或者可以叫石灘？）添！可見呢個地產資源絕對係有待發掘兼潛力優厚！

究竟有乜潛力呢？如果干德道豪宅可以賣到七萬蚊一呎，咁更罕有，更靚海景，更近水樓台，更私隱度高嘅私人豪島豈不是更加值錢？如果唔將佢地嘅潛力發揮出來，豈不是又畀其他區內城市捷足先登（泰國已經有，唔駛幾耐海南島肯定都會賣到成行成市）？港府實在有責任光大呢個東方之珠所獨有之天生麗質！

咁又有乜嘢人會買島呢？

本地富豪—如果連山頂南區都嫌唔夠私隱，又有乜嘢地段優越過擁有自己嘅水上皇國呢？

內地富豪—喺香港呢個天然嘅永久不凍港擁有資產係低調處理私人財富嘅上佳方法，更重要係多咗一個向其他有錢佬示威，提升自己江湖地位嘅利器！加上一國兩制，香港優越嘅法制，同其他配套（醫療、奢侈品消費、交通、等等）上嘅便利，呢個誘惑可能係無法抗拒！

東南亞華僑—喺當地畀人歧視，隨時資產充公嘅華人，一向有係香港投資，而家更加多咗一項可玩嘅概念，隨時會落更重本投資，由保本變成消費。

環球名人—香港搞咗咁多年都吸引唔到國際名人（唯一諗到嘅係尚高雲頓嘅阿叔，你話丟唔丟架！？如果看倌唔知佢係邊個唔好閉翳，彼過氣打星也）嚟落疊，所以多一個理由氹呢班有銀士嚟呢度消費落戶兼為香港做免費宣傳（以後機場長駐嘅狗仔隊就唔會係淨得本港傳媒，而係更加壯觀嘅環球精英啦！）又幾好呢？其實香港嘅軟性基建同英文水平唔輸比紐約倫敦好多，有一個好強嘅競爭優勢就係冬天呢度氣候宜人，又有季候風同深水港，非常適合避寒兼玩風帆遊艇，如果有埋私人島嶼，實在是天作之合，有乜野理由吸引唔到歐美富豪名人嚟呢度打躉？


屈指一算，如果263個島中賣到150個，每個用5,500呎最低大細嚟計（因為就算你買咗大啲嘅島，你都可能只會起大概4－6千呎嘅「水上皇宮」），政府都閒閒地收番八十二億地價（以一萬蚊呎樓面地價嚟計，當然實際地價可能會倍數如呢個數目，無他，呢啲島嶼重罕有過半山豪宅多多聲也！而且大啲嘅島可以賣多過一幅地皮出去），加上建築費，隨時再為本港增添最低三幾十億經濟效益，你話係唔係認真和味？曾特首，而家會唔會係時候著Invest HK同林局長成立一個跨部門小組，開始打造呢個香港第七大產業？今期篇幅有限，下禮拜再續談私人島各方面嘅細節。