將FILTH變成SILTH/TILTH

上文講緊島嶼之價值釋放，但係忽然殺出個英國狂加銀行花紅稅嘅新聞（財相Darling上星期提出徵收一次性50％嘅花紅稅，法國可能會跟着癲埋一份；但係美國呢次醒目好多，權衡輕重後靜靜地唔參予呢種自殺式嘅嘩眾取寵的選票伎倆），不如今期應節，就討論吓呢個咁新鮮滾熱辣的題目先！

讀者可能會問銀行花紅同地產專欄又點會拉上關係乎？其實大家睇睇中環最矜貴地段，租金最貴嗰幾棟大廈入面係乜嘢機構，就唔難明銀行業對香港地產嘅重要性係幾高啦。

金融風暴所披露嘅一個長期趨勢，就係未來嘅世界經濟重心一定會向東移；香港喺亞洲既然已經擁有優勢，依家就更應該快馬加鞭，乘勢增加自己嘅宣傳，大力吸引嗰啲正處水深火熱之中嘅海外銀行家，將佢地嘅懷疑同憂慮轉化為決心，甚至係行動─另起爐灶，實行做其永久稅務難民，脫苦海，投奔香江去也。

正所謂打鐵趁熱，依家正值紐倫當災，港滬興旺，與其同室操戈互搶市場，倒不如放眼世界，槍頭向外。喺彼等收入減少兼稅費大升嘅環境下游說國際金融機構步滙控後塵，移師香江，加速壯大我哋四大支柱產業之首嘅金融業（另三大產業乃旅遊、貿易及物流和專業服務），增加就業及稅收。

咁點執行呢個新玫瑰園計劃呢？第一，要制定長線遠景，令人聞聲則喜，包括量化未來香港每一個金融板塊（外滙，債券，商品，股票，衍生工具，私投，基金管理等等）嘅具體總量目標，令人相信政府將香港打造成呢個時區，甚至環球無敵嘅金融中心、總部基地嘅決心。
第二，為容納呢啲未來商機、描畫可信而又可達標嘅基建大計，包括寫字樓及豪宅供應（見本欄10月20號關於西九寫字樓供應之文章），文化悠閒設施，教育醫療支援，入境政策等等。

第三，由高層人物（如：政務司下設立金融沙皇之職，或者投資推廣專員）做統籌推廣，特首賜予尚方寶劍以理順任何機制上的阻力；第四，進行環球路演，約見包括中資在內嘅金融機構，為其遷移企業重心，甚或整體遷冊製造心理同實際嘅有利條件。

不過，基於香港已經係一個低稅率地區【見表】，港府頂龍可以喺路演或「撬牆腳」過程中應承未來幾多年稅率不變，但唔應該亦冇必要再免稅或補貼，以免 製造不公。如果能夠有效執行一個新玫瑰園計劃，到時香港有機會改寫銀行界一組風行多年的貶義詞FILTH（Failed In London Try Hongkong），將其句首中之Failed 變為Screwed或Taxed。