競猜遊戲：誰是真正嘅地產霸權？

今日唔知到底要開香檳慶祝定為香港前途哀悼，因為與民為敵嘅港府終於喺排山倒海嘅反對聲音下再次與眾建制派小丑上演第二齣變臉鬧劇—喺遞補機制立法上轉完軚又再轉軚（唐唐昨晚宣布草案押後二讀，終於「諮詢」公眾），令其既貽笑於國際社會，再失信於市民。東方之珠淪落到咁嘅田地，真係令人哭笑不得！

當然，除咗七一遊行內近四成半市民係申訴與遞補機制及雙普選相關嘅要求外，更有唔少遊行人士係為反對地產霸權呢個抽象理念而上街嘅。喺地產霸權呢個題目上，占飛於昨日已有甚佳嘅理論上闡述（見香港弊傢伙 弊在地產治港），筆者今日就狗尾續貂，喺數據上作跟進、分析！

港府明裡暗裡都係不折不扣嘅地產霸主

大家都知港府喺公共房屋上一直不遺餘力咁提供大量供應，以至全港有一半嘅住宅樓宇都係公屋及居屋，但係過去幾年政府有意無意地利用其直接控制嘅公共機構（即港鐵同市建局）更加大力介入埋私人市場，令私人發展商嘅市佔率不斷縮細，因而可以倖存繼續玩呢個高地價遊戲嘅發展商數目亦相應減少（基本上2011年第一季四大發展商喺新盤推售嘅市佔率已達八成四！），直接造成今日嘅地產業高度集中，消費者選擇越趨貧乏，民意對地產商（錯誤地）越嚟越不滿！

點解話民意係錯怪咗地產商呢？原來就算係大發展商如長實、新地之流，都要喺政府超低土地供應政策下向港鐵、市建局下跪，向其奉上優厚嘅分紅條件（有啲項目甚至將超過七成嘅發展利潤供畀呢兩個官僚機構之餘，仲要承受各種項目/工程上嘅風險，令現今嘅香港地產發展成為刀頭舔血嘅高危動作），如果唔係，大把人排住隊等去搶做政府本身/港鐵/市建局呢個超級土地操控集團所「恩賜」畀市場嘅嗰每年萬零個單位嘅供應！


圖一：港府直資機構喺私人市場賣樓數量似會於八年內翻一番！

圖二：港府連私人市場嘅市佔率都達五成，我不稱霸，誰與爭鋒？

喺呢個土地霸權嘅侵蝕下，港鐵加市建局有份嘅項目推售數目由03年嘅2000個爆升至09年嘅9000多似乎就唔咁令人吃驚耳【圖一】……但係又有幾多人知道，原來呢兩個公營機構有份參與嘅樓宇銷售市佔比，竟由03年嘅單位數字（約7%）升至今年第一季嘅五成之巨【圖二】？咁即係話，香港真正嘅地產霸權唔係任何私人發展商，而係以特首為首嘅特區政府—公屋連埋佢喺私人市場嘅介入，隨時已令政府嘅市佔率超越四分之三，如果連居屋都復建埋，睇怕連長實新地都要執包袱耳！

一個由遠離市場及民間疾苦嘅官僚所操控嘅市場，你話又點會唔波濤洶湧，充滿危機呢？而家又係唔係時候大幅增加土地拍賣比重，及完全取回港鐵及市建局嘅收地/批項目權，還市民一個理性嘅樓市，還市民選擇住屋產品嘅自由？