喺香港投資有樣好處，就係樣樣實物資產都係新供應低，唔似內地咁任何花錢可以起得出嚟嘅建築物都保證係大白象滿地，導致資本浪費、無謂競爭、兼服務水準低落。不過，香港嘅好處喺政府近年施政寸步難行及缺乏遠見下已經成為未來發展嘅絆腳石——喺包括住宅供應（見筆者10年6月29日文：增加供應：政府在等觀音顯靈乎），陰宅供應（7月20日文：骨灰龕政策有思），寫字樓供應（10月26日文：寫字樓供應危機更甚於住宅），的士牌供應（11月16日文：利民兼紓資產泡沫財爺應解凍的士牌），遊艇位供應（11月23日文：香江衙門屢失先機遊艇樞紐勢拱手讓人）都係……各位可能一啲都唔意外筆者今日講本港機場，提及嘅又喺容量迫爆危機！此外本文亦比較吓競爭對手如何步步進逼，一到香港無能力接新生意之時（一定係早過你同我所料！），就冷手執個熱煎堆搶吾飯碗，到時香港又是只有怪自己唔上進！
12月28日，機管局慶祝咗客貨量雙雙破紀錄至5000萬人次及400萬公噸（全年實際數字最終為5095萬人同413萬噸，同比上升10.3%及23.4%），儀式期間運房局長鄭汝樺話現時計劃足可應付至2020年嘅要求。但係遠至2006年，機管局發表嘅《香港國際機場2025》已經預期2025年客運量會增至8000萬人次，兼喺結論中提到「香港國際機場必須提升跑道的容量」，包括興建第三條跑道。然而五年下來，起第三跑道呢個吾駛搵顧問公司做研究都知嘅結論似乎仲停留喺紙上談兵階段！如果《2025》報告內提及嘅中國民航局預測2010-20年中國客運量10%年增長率應用喺香港，咁我哋有機會喺2015年就超越咗報告內要到2025年先達到嘅8000萬人次水平，即係話，就算聽日即刻拍板去馬，第三跑道都可能已經太遲！
此外，前民航處長林光宇亦提到就算機管局把用量上限由每小時59架次，提升至68架次，機場亦將於2017年飽和（以6.5%年增長率計）。而且，呢個只係一個理論上嘅計算，實際上，繁忙時間已經迫爆咗，任何新航班都要喺三更半夜升降，咁點做國際航運中心？為今之計，只有喺開工起第三跑道嘅同時，開始著手整合港府持股嘅珠海機場為未來改為香港第二機場鋪路，或者更加遠見啲，直情同時開始搵地起第二機場！如果唔係，咁邊個為五至十年後香港機場爆棚負責？
相比之下，其他城市就長線規劃得多；如北京據報會喺今年3月啟動興建位於大興區，具6000萬人吞吐量嘅新機場！喺奧運新機場大樓完工三年唔到就放眼將來，未雨綢繆，咁先係有魄力㗎嗎！再以星加坡為例，彼邦喺1999年已經開始建造彰宜機場嘅T3樓，並喺2008年一月投入服務，令獅城嘅運載能力跳升至7000萬人次（去年嘅實際客量只有4000萬多啲），但星加坡毫無自滿，已經密鑼緊鼓規劃緊Terminal
4，並會喺10-15年內建成！最後，連小弟弟深圳都喺10年二月動工起T3（啱啱喺一月封頂）兼建第二條跑道（今年六月投入使用），令總吞吐量增至4500萬人次（09年實際數字：2200萬），可見只要有決心，起機場係可以高效交貨嘅。
香港，係時候發奮力追啦！
筆者鬧得人多，今期改弦易轍，讚一讚先！對象唔係地產界或政界機構或人士，卻係創意無窮嘅搜尋器一哥Google；何解？因為佢最近推出咗另一個無敵產品叫做「Book Ngam Viewer」（且叫佢「搜書數字器」，網址喺：http://ngrams.googlelabs.com/），令研究任何用文字可表達嘅概念都可以由對某一啲字或辭喺書本嘅出現頻率作長線追蹤嚟比較該字或辭喺1800年到2008年止嘅「曝光率」變化！
因為Google已經掃描/數碼化咗近一千五百萬本書，呢個工具選用較可用嘅五百萬本書（若佔已出版書總量嘅4%）及其中五千億個字（包括3610億英文字同130億中文字）。因此我哋嘅「搜書數字器」都咪話唔公平、強大、有效！
用搜書數字器分析城際競爭
判斷一個國家或城市是否強大，當然唔一定話要佢GDP大過人，又或者樓價高過人；有麝自然香：如果一個城市嘅重要性毋容忽視，咁自然就有好多嘅書藉會提到該城市也。
筆者先喺亞洲區各競逐者之間用英文城市名作比較，發現原來香江喺遠東大埠中一係就係英文出版鼎盛，一係就真係一枝獨秀，遠遠拋離其他城市係書本入便嘅出現頻率（見圖一至圖四）。而歷史亦似乎印證圖中趨勢嘅轉變：
圖一：香港與上海
1）上海20-30年代嘅繁華令其頻率大大高於香江，但係70年代嘅經濟起飛卻造成香江從此超前；問題係，過去幾年本港嘅政治原地踏步加上上海嘅突飛猛進係唔係已經再度令紅藍線交錯？
圖二：香港與東京
2）東京嘅資產泡沫喺80年代尾爆破後，好快就被香港喺90年代初後來居上而追過！
圖三：香港與星加坡
3）星加坡直至80年代尾都被香江多見如書藉，之後亦被本港爬頭；令人擔心嘅只係，香港相對於上海嘅弱勢似乎喺過去兩三年亦喺星加坡身上出現……
圖四：香港與北京
4）「搜書數字器」追蹤文化變遷嘅能力喺北京顯露無遺—直到80年代中，Peking仍係主流稱呼，隨著中國嘅強大及普通話拼音嘅同行，Beijing亦取而代之成為北京嘅統稱！可見用呢個工具做研究分析，對文字歷史亦要有一定嘅認識！
圖五：香港與倫敦（英文）
圖六：香港與倫敦（簡體中文）
5）與倫敦相比，香港嘅英文頻率只有前者若八分之一，可見喺英語世界，香港仍遙遙落後。以簡體字搜索卻得到相反嘅結果，香港大獲全勝；睇嚟簡體中文一係就數碼化得唔夠，一係就係大陸研究英美嘅書籍仍然偏少。一定肯定嘅就係香港冇倫敦係世界上舉足輕重！
近個零禮拜港鐵嘅見報率唔差；除咗行政總裁明年尾唔續約嘅新聞被報道較多外，對公眾民生及政府施政更有重要性嘅卻係「新世紀論壇」、龐愛蘭同鄧咏駿議員辦事處所發布嘅「港鐵旺站商舖太多：阻乘客、礙應變、申請涉偷步」新聞稿！既然有人撩起呢個筆者欲訴已久嘅話題，今個禮拜就因利乘便，借題發揮：
利民空間變汗血廣場
任何十年前，廿年前曾出入過旺角、尖沙咀、銅鑼灣、中環呢啲大地鐵站嘅市民都可以同你證實，過去嗰種車站大堂嘅寬敞明亮、步履閒適嘅日子早已經消失殆盡！因為除咗嗰啲冇商業價值嘅閒站，基本上任何稍有租值（即係高人流）嘅車站，其大堂已經被各類港鐵所安插嘅零售店鋪逼個水洩不通（見圖）！出入站嘅市民有如排隊入屠房嘅豬隻般，步履維艱地被後面嘅人潮推向自己嘅目的地，冇晒尊嚴可言。
以中環站為例，大堂內除咗真正便民嘅設施如銀行，提款機，郵箱，及WiFi熱點之外，其他商店賣嘅都唔係一間市區地鐵站內所必需經營嘅行業：書店、花店令人滯留，增加市民進出阻力；咖啡店、麵包糕餅店除令公眾地方充斥氣味外，更直接鼓勵乘客違例將剛購買嘅食物帶入已付費區內繼續飲食；至於時裝飾物、美容產品、甚至旅行社就更加牽強，同港鐵作為一個做獨市生意嘅公共交通服務提供者角式越扯越無關係！
此外，過份擠迫嘅車站走廊，令人擔憂係唔係已經觸犯咗消防條例？新論壇嘅報告指出淨係旺角站嗰19間商店、尖沙咀站嗰16間、太子站嗰18間已經佔用咗近半公共走廊空間—萬一有火警或炸彈嗰陣，邊夠走廊嚟輸散人群？
利潤動機蓋過服務精神，唔值也
港鐵由08年到10年中，喺車站數目增加兩個嘅情況下，站內商店數目卻跳升60間到1246間之眾；似乎喺零售方面嘅收入2010全年會達17億之數，都咪話唔和味！
新論壇報告亦揭發地政署唔按章批核港鐵更改土地用途嘅申請，導致港鐵能補地價都未批嘅情況下就擅自擴建站內商店，甚或官官相護嘅嫌疑。《詩經·大雅·雲漢》有云：「兢兢業業，如霆如雷」，過去幾年港鐵管治似乎有欠呢股精神矣！
作為一個要為股東謀利嘅上市企業，有利潤最大化嘅商業動機本來無可厚非，只是港鐵同時亦係一個壟斷企業，更係政府控股，咁就應該喺商業行為上提高自己嘅標準到所謂「白過白色」嘅水平，如果唔係若再爆出如八達通賣私隱資料之類嘅醜事嘅話，加強監管，甚至收歸國有嘅呼聲只會增強。
筆者於11月23日同12月14日兩度為香港喺遊艇樞紐地位日漸落後伸冤，之後有幸翻閱「海港商界論壇」早於08年獲「香港規劃師學會年獎」之優異獎嘅《海港連通性研究》，更發覺呢個香港結構上嘅死局非特首出手不可—因為香港嘅海港發展之所以停滯不前，係因為衙門各司其職，只顧自掃門前雪，缺乏一個為海港及航運業發展作護航兼舵手嘅統籌部門。報告最斬釘截鐵，亦最多海港使用者埋怨嘅一個結論就係：「政府係海濱發展嘅最大絆腳石……政府係最大嘅問題所在」【註】！為咗令大家更認識點解香港喺呢個現代世界越趨重要嘅行業唔衰得，在下引述數字為證：
美國麻省：悠閒船艇板塊（由舢舨至超級遊艇）每年為麻省貢獻15億美元經濟效益（08年GDP為3650億美元），佔全美國行業嘅15%之多。麻省18.6萬之眾嘅註冊船隻（香港住冊悠閒船艇約6千5艘），每到旺季閒日都有5.6-9萬省內居民出船遊玩（周末更跳升到13-19.5萬人眾）。每年花喺購買船隻及配件嘅消費多達1.9億美元，連埋相關消費，數目就升到更可觀嘅17億元。全省有2.5萬由政府擁有及管理嘅船隻泊位，另一萬泊位由私人擁有（香港總泊位數目得約1千9咁少！）。整個船艇業僱用1.8萬全職人員，每年支取5億美元薪酬。
紐西蘭奧克蘭：「美洲杯帆船賽」因在奧克蘭停站而為當地經濟注入4.7億紐元（99-00年，01-03年之數為4.5億元，儘管大部分係喺當地造賽艇所產生嘅經濟活動）；另外「路易威登太平洋帆船賽」亦令當地09年經濟增益1千2百萬元；「VOLVO五大洋帆船世界盃競速賽」（無香港份卻喺亞洲站泊去三亞！）於11/12年賽事時會停泊喺奧克蘭11日，有兩份報告估計賽事將帶給該市約1千7百萬紐元嘅收益。而普華永道一份報告預計此項賽事可製造295個相當於為期一年嘅全職職位，已經佔奧克蘭遠洋郵輪業所僱用嘅472全職人員嘅六成以上！可見做高增值嘅帆船生意隨時比政府花巨款起啟德郵輪碼頭賺辛苦（人多消費少）、污糟（廢氣廢水垃圾亦因人多而膨脹）錢化算得多！
星加坡：全力衝刺做超級遊艇中心嘅星加坡就極之醒目，佢見到喺06年環球超級遊艇已有4000之數，更價值連城，估值喺1千億美元以上（！），並以8-10%年增長率攀升。此外，超級遊艇嘅平均長度由95年嘅35米加大到現今嘅45米，即係話未來嘅船隻價值會更加飆升！計入船艇價值約10%左右嘅年均運行費用，可以推算出做超級遊艇母港嘅優勢有幾大！星加坡依家只佔呢個市場嘅1%，但已經係一個1億美元嘅和味生意…星加坡政府更已早著先鞭，唔單止令佢嘅硬件能接待呢班巨無霸，更打造自己為宜居城市，咁啲富豪就更無原因唔泊埋呢個碼頭啦！可見香港喺呢舊大肥肉嘅爭奪上又使上演一幕龜兔賽跑。
最後提一提，起遊艇基建唔同於辦F1賽車或亞運：投資喺海港嘅設備係可以本地市民應用，多咗泊位自然就多機會令悠閒航海普及化——你覺得禮拜六日去無聊逛商場有意義定係揚帆出海，親近大自然，兼學得一技傍身有益？
時不與我，望本港能急起直追，挽回頹勢，則善莫大焉。
【註】：見原文http://www.harbourbusinessforum.com/en-us/page/show/report_connectivity第128頁
筆者喺11月23日粗略講述咗本港喺都市規劃欠缺遠景，行政部門固步自封，各自為政之下，搞到依家新崛起嘅內地對手唔單止喺遊艇工業硬件上已追過香港，甚至軟實力上都有拋離之勢；更有甚者，連香港自己過去一向嗤之以鼻嘅新加坡及從來都係自稱小弟弟嘅深圳都已經開始各擅勝場，可視香港如無物，豈不是暴軫天物，斷送香江舉世無雙嘅深水港，不凍港（或四季宜航港），自由港，美麗山水港（全部都係天津、上海、星加坡等地望塵莫及嘅）優點！
呢度就再睇睇上文冇篇幅覆蓋嘅星加坡同深圳……
順手上網查閱被認為國際上重要嘅遊艇展，大家可能會發現香港嘅黃金海岸同白沙灣遊艇展根本就唔上榜—亞洲只有東京同上海出現。但係星加坡喺自己默默努力下，超級遊艇嘅訪港數目由2006年嘅18艘增至2007年嘅28，然後再上升至2008年嘅54艘，雖然相對與環球超級遊艇5000之數還是比例很低，但係已見到星加坡政府嘅遠見同決心，何解？政府喺遠至98年已經計劃聖淘沙遊艇會，Keppel
Bay遊艇會，以至最近成形嘅Marina Bay未來遊艇/富人總匯。
深圳亦不甘後人，唔單止具有香港嘅各項優點，更是是中國盃嘅比賽場地，香港政府搞咁多Trade Show，點解就忘記咗呢個咁高價值嘅展覽？心態嘅轉變喺呢到尤為重要：喺書展賣一百萬本漫畫可能都比唔上喺遊艇展賣一艘遊艇！
遊艇業係一個奇妙嘅行業，平時啲船可能泊喺度靜如處子，但係所產生嘅租金收入，支付與機械工程師、裝修行業、清潔工人、海事公務員、甚至更遠嘅船務金融、買賣、法律等各行各業人士，冇話唔牽連甚廣，對經濟嘅貢獻冇話唔大。但係呢項活動更是動如脫兔，君不見大型遊艇賽事之時，千帆並舉，壯觀激奮？而每逢大賽之際，更是環球有銀士聚焦之時，喺呢啲場合百億「大刁」隨時做成，再益多次本土服務行業……政府與其花數以百億去起啲大而無當，中看不中用嘅亞運場館，點解唔丼錢入本文所討論嘅高增值航海業呢？曾特首請一聲號令，組成如星加坡促進遊艇業嘅跨部門局級辦公室，為香港眾多嘅天然良港點綴上千帆萬桅，增添呢個東方之珠嘅璀璨光輝。
