顯示包含「單車計劃」標籤的文章。顯示所有文章
顯示包含「單車計劃」標籤的文章。顯示所有文章

2010年8月17日星期二

國際單車普及,香港發勁未遲

上個禮拜起咗個頭講點解政府唔應該歧視單車,及提議喺施政報告時起錨,為呢個咁綠色環保有益身心嘅交通模式著著綠燈。本文繼續單車專題,探討究竟世界各地已行之單車計劃,能為本港呢方面嘅政策思路作何參考。

單車計劃已喺四十餘城市推出

唔講唔知,講出嚟可能嚇大家一跳:根據維基百科紀錄,現時已經有(或曾經推出過)單車分享計劃嘅城市已有四十三之眾,而且絕對唔係只限於各位心目中已熟悉嘅阿姆斯特丹同哥本哈根等北歐國家!名單內既有汽車癡戀大國(如美國嘅丹佛市同華盛頓),亦有歐豬四國成員(西班牙嘅塞維爾市及意大利米蘭市),更連南美「落後地區」(如智利嘅Providencia與巴西嘅里約熱內盧)都有份;更令人驚嘆嘅係連大陸嘅杭州(叫做公共自行車,甚至連網站都有埋:http://www.hzzxc.com.cn/)同海峽對岸嘅台北(稱為微笑單車)都已超越香港而躋身國際前茅,推行綠色交通,咁又點唔叫人嘆息港府再係多一領域落後對手呢?


點解香港係最適合公共單車計劃?
同先進城市相比,香港嘅單車使用率(以出行次數中單車作為交通工具之比例嚟計)微乎其微,筆者估計連倫敦嘅百分之二都唔到(當地政府目標係2025年升至百分之八),更遑論阿姆斯特丹同哥本哈根嘅百分之四十同百分之三十二!

但係香港其實係最適合全城密集地推行公共單車計劃,點解?因為地少人多(特別係港島同九龍半島),每程距離因此必會比其他低密度城市短,因而使用頻率/密度亦可以比任何城市為高;亦即係話,喺香港實行公共單車計劃可為市民節省嘅等候時間、電油消耗、上下地鐵隧道所費光陰距離、兜單程路嘅無謂冤枉路等等隨時更勝已成功運作呢類計劃嘅大城市!此外,香港樓宇密集,缺乏私人泊單車地方,所以分享共用單車能較每人自有私己單車更有效利用公共泊位空間。只要提供足夠車輛數目(如巴黎嘅Velib計劃有為數兩萬之單車,約全市每一百一十人一輛)又喺足夠密度嘅地點開設存取點(巴黎有一千六百三十九個,每兩點間距離約三百米)自然就會有足夠嘅方便度令人喺交通選擇上不作他想!

以巴黎經驗嚟睇,可能喺香港島要一萬架單車,而九龍半島則需要兩萬架,以及總共不少於二千四百個存取點。

點解應該政府出錢而唔私人買車?

政府每年花喺建築或維修公路上嘅花費隨時數以十億計,但係相比之下,單車嘅成本根本微不足道;有研究顯示每輛單車每年嘅總成本係一萬五至兩萬二元之間(呢個係歐美高人工地區嘅常規,香港隨時係呢個數字嘅幾分之一),咁香港如果有三萬架單車嘅話,都只係每年駛去四億五元咁大把,兼且如果每車每日用五次嘅話咁每次使用成本更只得八個二!可見作為一項資助嘅公共交通服務,政府實責無旁貸!實際上,喺巴黎同巴塞隆拿嘅經驗係非常令人鼓舞嘅:1)每日每車用量高達十至十二次;2)有車嘅區內約一成半至三成嘅出行係以公共單車代步; 3)汽車用量減少約百分之八至十。

基於以上種種數據,筆者覺得政府好難攞出理由嚟繼續推搪、拖延實施一個較為似樣嘅市區單車計劃。萬里之行,始於足下,望施政報告做個好嘅開始啦!

2010年8月10日星期二

倫敦市長身先士卒,香港特首何時起錨?

今日筆者對呢位衣著唔多整齊,外貌略似亞燦嘅倫敦市長波理士莊遜(Boris Johnson)敬意大增,何解?因為讀咗佢零九年八月喺《每日電訊報》撰文倡議保守黨政府廢除年消費二千萬英鎊嘅「部長座駕」呢項福利,令英國呢班數目上百(!)嘅高級公僕更加接近群眾,同時為納稅人慳番巨款。吾所欽佩者不但係呢位仁兄嘅創新見地同挑戰權貴之勇氣,更第一次接觸到佢嘅鬼馬生趣嘅文筆,能嬉笑怒罵間令讀者折服於其感染力之下,值得一讀【註】。

更令人折服嘅係呢位倫敦市民普選出嚟嘅市長原來身體力行,經常以單車代步返工!就算喺紐約,市長彭博都經常坐地鐵上班,相比之下,香港特首同旗下眾高官就似乎相形見絀—有幾多位讀者有見過本港嘅一眾司、局、署長平時係行路或踩單車返工?就喺去年九月莊遜撰文之時,香港綠色和平有咁啱送咗駕單車畀特首曾蔭權,邀請佢以身作則實踐低碳生活,於合理步行範圍內棄用私家車,改用單車及步行,為氣候變化而努力;唔知時至今日,曾先生又有幾次棄用特首座駕而騎單車或步行往來禮賓府三百米外嘅教堂及距離更短嘅政府合署?

港府歧視單車與文明管治格格不入

上文所提及嘅喺莊遜市長喺七月三十號再創新猷,喺倫敦市推出劃時代嘅全市單車租賃計劃:當日倫敦同時推出五千駕單車,分佈於市內三百一十五個泊位點,並有一萬二千市民登記成為呢個單車會嘅會員,實在令人振奮!

市長喺致辭時形容呢個係「使倫敦成為最偉大嘅單車城市嘅一場聖戰(crusade)」,並會喺短期內增加計劃中單車嘅數目至六千輛,泊位四百個。與此同時,倫敦2012奧運組織亦大力配合,制定「百分百觀眾以公共交通工具、步行、及騎單車三種模式到達場地」呢個目標。
由倫敦喺單車政策上嘅領先可見呢個城市由上至下對環保、健康、生活質素嘅高度重視同全城參與,比起香港處處排擠單車,樣樣汽車掛帥真係高下立判。

篇幅所限,需另文討論各國單車計劃嘅優劣。最後留俾大家一項驚人數字,希望能令本地當政者聞之慚愧,早日懸崖勒馬:去年被政府因「非法泊車」而沒收嘅單車竟達一萬零八百之數!香港如此「迫害」環保健康嘅單車而追捧浪費折壽嘅汽車,實惡法也!

鼓勵單車殊甚容易,施政報告已可實施

望特首高瞻遠矚,從德政而納單車—包括闢單車徑、撥汽車位為單車位、研究港版單車租賃計劃等等—呢啲都係簡單易行,成本低廉嘅政策,更係文明社會所向。希望特首能趕喺十月施政報告宣佈,則香港有救,地球得赦,民望可歸矣。

註: http://www.telegraph.co.uk/comment/columnists/borisjohnson/6116598/David-Camerons-first-task-should-be-to-get-his-ministers-out-of-their-cars.html