置業退稅對租樓無援：政策傾斜是否應該？

喺全城為明日之財政預算出謀獻策，並引頸期盼眾多似乎打風都打唔甩嘅「派糖」措施時，香港會計師公會提出咗一個有趣嘅建議，就係政府提供租金扣稅優惠，減輕租客負擔，而扣稅年期則為15年，並以每年10萬元為上限，令買家、租客均可享有扣稅優惠。

點解買樓嘅人較租樓者更值得政府打本幫助？

以上提議帶出一個值得深思嘅問題，就係點解政府覺得居者置其業值得鼓勵，但係居者租其樓卻不值一哂？呢種買樓神聖過租屋嘅公共政策又係點樣發展出嚟嘅呢？是否所有政府嘅施政目標都係鼓勵子民落地生根、穩定順從、易於管治？政府係咪認為租樓者遊離不定，今日幫咗佢聽日佢就帶著福利嘅著數遠走他鄉？歡迎有高見嘅讀者賜鄙以詳！

筆者喺去年9月28日拙文「資助置業樓市泡沫元兇」中略有探討美國墮入「買樓至上」呢個政策教條嘅來龍去脈，以及呢項社會工程所帶來嘅副作用。香港實在應該以英美活生生嘅世紀樓市泡沬例子為鑒，避免喺市民喺缺乏能力嘅時候——特別係依家樓價高企之時——鼓勵佢哋入市。十一月時減低按揭成數係一個近年少有嘅德政，現在實在係時候趁預算案之機，連居所貸款利息扣稅呢項優惠都廢埋佢！咁樣既可釜底抽薪，減少另一個入市嘅人為誘因，幫助市場降溫，更可為庫房慳回數以億計嘅稅款！此外，三數年後，財爺更可避免面對唔少喺市頂因為財政鼓勵而跳入火坑嘅苦業主——咁先至係有遠見嘅高招矣！

廢除置業利息扣稅可與引入租金扣稅並行

再進一步，財爺甚至可以喺廢除置業利息扣稅（減低樓價上升動力）嘅同時幫助租樓人士喺薪俸稅／個人入息稅內扣除一部分租金支出（間接減輕「無殼蝸牛」嘅租金負擔）。其實如果有限公司可以喺利得稅入面扣除租金支出，咁點解個人課稅又唔能夠引進同樣嘅措施呢？由社會工程嘅角度嚟睇，資助無產階級（租私樓嘅大多係不願接受政府福利，或係低下中產階級）似乎比資助有樓階層更能重新分佈財產，更減低起居屋嘅政治壓力，更有益於社會和諧？


租金扣稅嘅其他好處有：１）政府能夠直接增加市民嘅租樓意欲，增大租務市場嘅活力、流通量、甚至租房存量嘅質量；２）養活更多經紀、裝修、搬運等低薪或低技術行業，以及隨著更多經濟活動而導致嘅庫房稅收上升；３）間接減低公屋與私樓嘅實質租金水平，令公屋居民更有誘因騰出單位來畀更有需要嘅市民。實在係多利而無一害！